مساء الخير 

الماك اند تشيز من الأطباق المفضلة في بيتنا والشي اذا ادمنت عليه فترة الا و تبدا تبتكر اشياء بسيطة تغير من نكهتها المعتادة

استخدمت الجبن المدخن منزليا و السبب ان ابي نوع جبن معين للماك اند تشيز وانا اشوف ان افضل طعم لها هو التشدر بس اكيد يرجع لكل احد و ذوقه

تغيرت الوصفات و تطورت و البعض صار يستخدم كريمة بدل الباشميل الخفيف، انا شخصيا اشوف الكريم ثقيل و يقعد عالكبد يعني برضو انا ابي اسوي شي لذيذ و مايغثني :/

في هذا الطبق طريقة تقديمي كانت مختلفة شوي بحيث اني ماكملتها على الطريقة التقليدية اني احطها في صينية بايركس و انثر بريد كرمبس من فوق و اخليها تتحمر بالفرن

انا استخدمت بدل البريد كرمب اللي هو بيكن بقري محلى مع فلفل كايين يمكن الفكرة غريبة شوي بس حبيت اعزز طعم الجبن المدخن بطريقة مختلفة

طريقة البيكن البقري راح اشرحها لكم تحت

التدخين البارد

التدخين البارد هو الحصول على نكهة التدخين من غير طبخ يستخدم للأجبان عشان ماتذوب و برضو السالمون المدخن تم تدخينه بهذي الطريقة ولأكلات مختلفة ثانية حسب الطبق المبتكر

موجود جهاز في ليكلاند سعره ٥٠٠ ريال تقريبا للتدخين البارد بس بما اني هذي الفترة مو حريصة عليه كثير ماجبته عشان ادخن جبن لمره وحده

انا طبقت طريقة بأدوات موجودة في كل بيت ممكن يغنيكم عن الجهاز، و رقائق الخشب موجودة عند ساكو بنكهة الكرز و التفاح اعتقد

علبة اسطوانية خرقتها بمسمار من الأعلى بس ، لازم هذي الخطوة احد يساعدكم و يمسك العلبة

ولعت فحم طبيعي لين صار جمر و حطيت الفحم وفوقه الوود تشيبس – البسوا قلفزات في هذي الخطوة لأن راح ترتفع حرارة الاسطوانه

و نحط الاسطوانه في الغريل و الجبن يكون في الجهة المقابله مو فوقه

ونقفل الغريل لمدة ٢٠ دقيقة و المدة حسب كمية الجبن و العدد انا دخنت ٤٠٠ جرام جبن تشدر من الاجبان بالكيلو

و في حالة لو ماعندكم غريل تقدرون تطبقون الطريقة على قدر تحطون الاسطوانه في قاعدة القدر و فوقه شبك و عليه الجبن وتقفلون القدر وتغطون الجوانب بقماش

الطعم رهيب و لذيذ راح تدمنون عليه لو تحبون الطعم المدخن 

——

طريقة الماك اند تشيز تكفي لشخصين او ثلاث اشخاص طبقوا الطريقة بالضبط من غير جبن مدخن اي نوع تفضلونه بس انا حبيت اطور النكهة

المقادير:

كوب و ثلث ماكروني باستا صغيرة الحجم اي شي – الكمية بالأكواب قبل الطبخ

١ م ك زبدة

٢ م ك دقيق

٦٢٥ لتر حليب كامل الدسم بارد

كوبين جبن تشدر مبشورة

نص م ص ماسترد

ملح و فلفل اسود

٣ شرايح بيكن بقري 

٢ م ك سكر بني

نص م ص فلفل كايين

———————

نسلق الباستا لين تستوي و نصفيها و نخليها على جنب

نسوي الرو اللي هو نذوب الزبدة و نقلبه مع الدقيق لين يشقر و نضيف الماسترد و بعدين نصب الحليب بالتدريج و نقلب بالويسك او الخفاقة اليدوية

نخلي الحليب يطبخ لمدة دقيقتين و آخر شي نحط الجبن المبشور و الملح و الفلفل الابيض

و نطفي النار و نقلب الباستا مع الصوص

نشغل الفرن من فوق بس و نحط الماك اند تشيز في صينية بايركس حجم وسط وننثر فتات خبز او بريد كرمبس او بانكو

و ندخله الفرن يتحمر 

البيكن البقري المحلى او كانديد بيكن مع فلفل كايين

انا بكتب الطريقة اختياري ممكن تستخدمونه في طبق من غير الماك اند تشيز

٣ شرايح بيكن نقطعها ربع اصبع

نخلط السكر و الفلفل بصحن و نغلف فيه البيكن كل الجوانب

و ندخله الفرن في اعلى رف و الحرارة من تحت وفوق لمدة ١٥ دقيقة

—–

التدوينه فيها شروحات لأصناف مختلفة بالامكان الاستفادة من اي واحد فيهم في اطباق اخرى