صباح/مساء الخير
من الأشياء المفضلة عندي وكنت دايم أسويه عالشواية الخارجية، صحيح إن المألوف دايم أجنحة دجاج مقلية بس هذا التكنيك مره بسيط و سريع و لذيذه ممكن تستبدلون أي صوص أو تتبيلة مختلفة
الطريقة مره سهلة وبيكون فيه ترِك بسيط هو إن راح ننثر بيكنق باودر على الأجنحة قبل الشوي و السبب إن البيكنق باودر لما يختلط مع رطوبة الجلد بينتج غاز ثاني أكسيد الكربون يتبخر مع حرارة الفرن مكون فراغات و طبقة هشه خفيفه
وفيه طريقة ثانيه هو إن لو كان الفرن فيه مروحة راح نشغلها على أوطى حرارة و نخلي الجلد يجف وبعدين نكمل طبخ
الطريقة الثالثه بعد التتبيلة نجففها مره زين و ندخل الأجنحة الثلاجة ليلة كاملة حتى يجف الجلد
أنا طبقت الطريقة الأسرع هو البيكنق باودر متأكدة بتعجبكم التتبيلة و الطريقة بإذن الله
المقادير تكفي لشخصين ضاعفوا المقادير في حال زاد عدد الأشخاص
المقادير
٥٠٠ جرام أجنحة دجاج يفضل من شركة اليوم لأن حجمهم أكبر
مقادير الصوص و التتبيلة
٤ فصوص ثوم مهروسه
نص إصبع زنجبيل رطب مبشور
عودين ليمون غراس مفروم بالسكين الجزء الأبيض فقط
ملعقتين كبيره و نص دارك صويا صوص – متوفر بالبقالة الكورية
ملعقتين كبيره و نص صويا صوص معتدلة
٣ ملاعق كبيره خل الأرز أو خل تفاح
نص كوب سكر أبيض
ملعقتين كبار فلفل أحمر ناشف أو ملعقة وحده لو ماتفضلون لذعة الفلفل قوية
٢ م ص ملح
م ص بيكنق باودر
في قدر صغير نحمس الثوم و الزنجبيل و ليمون غراس لين تطلع ريحتهم
نضيف زيت السمسم و نوعين الصويا صوص و الخل و السكر و الفلفل الأحمر الناشف و نقلبهم ونخليه يطبخ على نار هاديه مره لين يذوب السكر
و نخلي الصوص يبرد تماما قبل مانضيفه على الأجنحة
في هذه الفتره لين يبرد الصوص نجهز الأجنحة نجففها تماما من أي رطوبة و نقسمها لجزئين
نحط كل الاجنحه في قالب و ننثر عليهم الملح قبل إضافة التتبيلة ، ليش ماحطينا الملح في الصوص؟ لأن راح نحتفظ بجزء من الصوص للتغطية في الأخير و التغميس ف يكفي ملوحة الصويا صوص
نصب ثلثي كمية الصوص على الدجاج (نحتفظ بالثلث) بعد إضافة الملح و نقلبه مره كويس و نغطيه و ندخله الثلاجة ليلة كاملة أو لمدة ٤ ساعات على الأقل
قبل الطبخ نشغل الفرن من تحت على درجة حراره ٢٠٠ مئوية و نجهز صينيه ونغلفها قصدير من داخل عشان العصاره بتنزل و صعب تنظيفها و فوقها شبك (ندهن الشبك بالزيت لأن الأجنحة راح تلزق) و نجفف حبات الاجنحه من الصوص بمناديل المطبخ
و نجيب صفايه صغيره ننثر فيه البيكنق باودر بشكل خفيف على كل الأجنحة
و ندخلهم الفرن لمدة ١٠ دقايق و بعدين نشغل الحرارة من فوق و نحمرهم لمده ١٠ دقايق كذا صار ٢٠ دقيقة طبخ
بعد الفرن ندهن الأجنحه بباقي الصوص أو التتبيله مهم هالخطوة حتى يعزز الطعم الأكثر و إذا بقى من الصوص تستخدمونه للتغميس
من الصوصات الإضافية الرانش كمان يخفف الحرارة لو يكون جانبي و تغمسون فيه
و بالعافية عليكم
