مرحبا

الكالزوني من الأكلات اللذيذة اللي تعتمد على الذوق العام..يعني الأساس هو العجينة وتكون عجينة البيتزا العادية

اما الحشوة فتعتمد على ذوقكم يعني مشروم و سبانخ وجبنه او بس مشروم و جبنه او زي ماحشيتها انا فلفل رومي احمر مشوي و سلامي

و ممكن جبنة ريكوتا و سبانخ ا( احب مع الريكوتا اضيف عليها شوي ملح البحر ) أو مكس اجبان او اي شي يخطر على بالكم 

انا حبيت اغير في الكالزوني و خليت الطماطم مقطعة زي ماهي ماطحنتها طلع الطعم لذييييذ غير عن البيتزا 

بالنسبة للعجينة انا اعتمدت العجينة اللي كنت حاطتها من زمان في المدونة يعني جدا سهلة ماتحتاج تخمير فترة طويلة

درس البيتزا بنزله ان شاءالله قريب راح تكون فيه اكثر من عجينة 

و لفرد العجينة اهم شي تكون نحييييفة حاولوا قد ماتقدرون ماتسمكونها..و انا قسمت العجينة لثنتين طلعتلي حبتين كالزوني كبيرة او قسموها لثلاث واحشوها حشوات مختلفة

و خبزتها على الحجر اللي هو ال

Pizza stone 

الحجر تلقونه في تافولا لو تبون افضل نتيجة للبيتزا اخبزوها على حجر وشوفوا الفرق كيف

———

المقادير:

مقادير العجينة 

كوبين و نص دقيق

م ص وربع خميره فورية

م ص ونص سكر

رشة ملح

م ك زيت زيتون

كوب موية بدرجة حرارة الغرفة

مقادير الصلصة و الحشوة :

علبة طماطم مقطعة و مقشرة

م ص ثوم بودرة

م ص بصل بودرة 

م ص اوريغانو ناشف

م ص ريحان ناشف

م ص ملح

نص م ك سكر

م ك معجون طماطم

الحشوة:

1 فلفل رومي احمر

10 شرائح سلامي مقطعة بشكل طولي

1 حبة جبنة موزاريلا بوفالو (طازجة ) أو اي جبن موزاريلا متوفر

——————————————

اذا كنتوا بتخبزون على الحجر يفضل تشغلون عليه الفرن قبل الخبْز بكم ساعة انا شغلته لمدة 3 ساعات و على درجة حرارة 250 سيلزيوس

نخلط المواد الجافة مع بعض الدقيق و السكر و الخميره من دون الملح..بعدين نضيف الزيت زيتون و الموية و نخلي العجانة تشتغل على البطيء واحنا نضيف الموية لين الدقيق يمتصه بالكامل بعدين نضيف الملح و نرفع سرعة العجن للوسط ونخليها تعجن لمدة 10 دقايق..

بعدين نحط العجينة في صحن و نرشه زيت زيتون و نغطيها كويس ونخليها تخمر و يتضاعف حجمها اهم  شي تكون في مكان دافي

صلصة البيتزا زي ماقلت انا ماطحنت الطماطم و انتبهوا فيه قطعة او قطعتين قاسية مرا حاولوا تشيلونها

على المقلاه نطبخ الطماطم من غير زيت ولا اي دهن و نضيف معجون الطماطم ونقلب لمدة دقيقة بعدين نضيف باقي المقادير ماعدا الملح

و نخليها على نار واطية مرا لمدة 5 ل 8 دقايق او لحد ماتثقل الصلصة و آخر شي الملح و نتركها تبرد 

بالنسبة للفلفل الرومي الأحمر انا شويته على الغاز تقدرون بالفرن لحد ماتصير القشرة سودا تقريبا  ويذبل الفلفل بعدين دخلوها في داخل كيس صغير لمدة 5 دقايق كذا يسهل عليكم ازالة القشرة منها وبعدين قطعوها شرائح طولية

بعد ماتخمر العجينة نقسمها لنصين او  ثلاث اقسام..

ملاحظة

اذا ماكانت عندكم الخشبة اللي تنقل العجينة للفرن افردوا على ورق زبدة عشان يسهل عليكم نقلها الكالزوني و بعد 10 دقايق من الخبْز شيلوا ورقة الزبدة من الفرن

نفرد العجينة على شكل دائرة زي البيتزا بس اهم شي تكون نحيييفه 

ونحط الحشوة اول شي الصلصة وبعدين باقي المقادير

نقفل العجينة نخلي الأطراف تتقابل و نضغط عليهم لين نحس انهم تلاصقوا بعدين بالسكين نسوي فتحات من فوق بشكل طولي عشان الهوا يطلع

و ندخله الفرن لمدة 20 دقيقة تقريبا او لين تخبز وتستوي 

——–

و بالعافية