مرحبا

من فترة كنت ادور على وصفة شوربة دجاج تكون لذيذة و من غير كريمة او حليب..و بنفس الوقت كنت ابي اعتمد على المرق المنزلي يعني كنت ابحث عن طريقة تخليكم تسوون الشوربة بالمرق المنزلي غصبن عنكم هههههههههه

انا كنت حاطة طريقة لعمل مرق الدجاج المنزلي

هنا

و الطريقة تسوون كمية كبيرة تستخدمونها في اكثر من طبخة يعني صوصات او شوربات او أي وصفة تحتاجون فيها المرق احسن لكم طبعا من المرق الجاهز ..بس لو في حالة المرق خلص ! هنا في هذي التدوينة راح اشرح طريقة المرق السريع  حق استخدام وصفة يعني لو كنتوا مستعجلين او ماعندكم وقت للمرق اللي ياخذ اكثر من ساعة هذي الطريقة راح تسعفكم ان شاء الله

و بالنسبة للشوربة تقدرون تستبدلون الباستا و الكوسا بالنودلز بس وطبعا من غير طماطم..يعني تمشون على الوصفة زي ماهي بس تلغون الكوسا و الطماطم و تستبدلون الباستا بالنودلز

————————————-

المقادير:

مقادير المرق:

 دجاجة حجم 700 جرام

1 جزر صغير مقطع مكعبات صغيره

1 عود كرفس مقطع تقطيع صغير

1 بصل متوسط الحجم نقسمه لنصين نص نقطعه تقطيع عشوائي و النص الثاني مفروم ناعم

نص م ص زعتر ناشف

1 ورق غار << اختياري

مقادير الشوربة :

2 كوسا  صغيره مقطعة مثلثات صغيره

كوب باستا الأصداف حجم صغير 

1 علبة طماطم مقشره 

نشيل البذور منها و نقطعها و نفرمها بالسكين

ملح وفلفل و الكمية حسب الذوق

——————————————————-

نبدا بالدجاج نشيل الصدور مع العظم و نخليها على جنب و باقي الدجاج كله من سيقان و اجنحة قطعوها قطع صغار و استخدموا سكينة حادة عشان مايتعبكم التقطيع

نشوح  قطع الدجاج  على مرحلتين ب 2 م ك زيت  لحد مايصير بني كل الجوانب 

على نفس القدر نضيف البصل و الكرفس و الجزر و نشوح لمدة 5 دقايق او لحد مايقلبون على الذهبي بعدين نرجع  قطع الدجاج للقدر و نقلب مع الخضروات و ونوطي النار لأقل شي ويفضل تحطون الحديدة تحت القدر

و غطوا القدر  من غير موية ولا شي وخلوه تقريبا 20 دقيقة و السبب هنا نبي نتخلص من موية الدجاج عشان اذا سوينا المرق يصير بس ناخذ الخلاصة ولا تخافون ماراح ينحرق 

وهذا شكله بعد 20 دقيقة

نشيل صدرو الدجاج  من القدر و نخليها على جنب و نشيل الحديدة من تحت القدر و نصب على الخضروات و قطع الدجاج لتر و نص موية حارة و و نضيف ورق الغار و الزعتر و نخلي المرق على نار واطية مرا من غير ما نغطيه لمدة 20 دقيقة

بعدين نصفيه و نتركه على جنب لمدة 5 دقايق و نشيل الدهن من فوق وبكذا يكون المرق الجاهز 

نبدا نسوي الشوربة ..بعد ماتبرد الصدور نشيل الجلد و نسحب اللحم من العظم راح تلاحظون ان الصدرو مااستوت هذا شي عادي لأن راح نرجع نطبخها من جديد مع الباستا ..نقطع الصدرو بشكل عشوائي باليد

انا نظفت القدر ورجعت استخدمته من جديد ههههه لأن حجمه مناسب لكمية المرق

بعد مايبرد المرق راح تلاحظون دهن على الجوانب و شوي من فوق شيلوها بالملعقة وحطوها في القدر لأن راح نشوح البصل من دهن الدجاج 

نشوح البصل لمدة دقيقتين وبعدين نضيف الكوسا ونقلب لحد ماتذبل تقريبا من 5 ل 7 دقايق..بعدين نضيف الطماطم و نشوح ونضيف شوي من العصير الموجود في علبة الطماطم و بعدين نضيف الدجاج

نرجع نضيف المرق ونخليه لين يغلي وبعدين نضيف الباستا وبعد ماتستوي الباستا نضيف الملح و الفلفل الأسود

 تقدرون تحفظونها في الثلاجة لمدة يومين

و قدموها مع جبنة بارميزان مبشورة 

و بالعافية