مهم قبل قراءة هذي التدوينة تقرأون الدرس الثاني لأن فيه طريقة ضبط و اشعال الفحم

حطيت لكم ٦ وصفات مختلفة ، المهم عندي التطبيق على الشواية ولا الوصفة نفسها قابلة للتغيير و التعديل من عندكم..

راح نبدا بالشوي المباشر مع اختلاف درجة حرارة الفحم او الغاز

طريقة قياس الحرارة في الفحم تكون من احساس كف اليد، و مدى تحملها للحرارة

تحمل الحرارة لمدة ثانيتين = حار جدا

تحمل الحرارة لمدة من ٥ ل ٦ ثواني = متوسط

تحمل الحرارة لمدة ١٠ ثواني = من متوسط إلى بارد

مقياس الحرارة اللي حاطته تقريبي بس اذا استوى الأكل لا تتقيدون بالوقت بالضبط

—

الشوي المباشر

حار جدا 

تي بون ستيك مع صلصة شيميشوري

سمْك الستيك للشوي يكون من إنش ونص لإنشين.. أقل من كذا ينشف يصير زي البلاستيك..بمناديل المطبخ ننشف أي رطوبة من سطح الستيك و ندهنه بزيت زيتون و نرشه بالملح

مدة الشوي تختلف باختلاف درجة الاستواء اللي تفضلونها

٤ دقايق على كل جهة – ميديم رير

٥ ل ٦ دقايق على كل جهة – ميديم 

لا تزيدون عن الميديم في الستيك.. و نترك الستيك يرتاح لمدة ٥ دقايق قبل التقديم

صلصة الشيميشوري:

ربع كوب ليمون – ثلث كوب زيت زيتون -بقدونس مفروم ناعم – فص ثوم مهروس – فلفل حار مجفف – ملح

بعض المقادير ماكتبت كميتها قدروها بحيث يتناسب مع كمية الزيت زيتون – نخلط المقادير مع بعض و نحفظها بالثلاجة لين تقديم الستيك.

——

ريش الغنم

ريش الغنم من أسهل الأشياء و أسرعها حتى ماتحتاج تتبيلة ولا اي شي

و طريقة الشوي نفس الستيك المدة تعتمد على درجة الاستواء.. الريش لحمها طري و تستوي بسرعة ٣ دقايق بالكثير على كل جهة او ٤ دقايق اذا مرا تبون استواء كامل

ندهن الريش بزيت زيتون و نرشه بالملح..و نشوي ٣ دقايق على كل جهة ونتركها ترتاح قبل التقديم

ملاحظة:

البرجر يدخل ضمن نطاق الشوي الحار بالنسبة للقرص الواحد ياخذ من ٥ ل ٨ دقايق شوي

————–

شوي حرارة متوسطة

سمان مع تتبيلة دبس الرمان

المقادير :

٦ حبات سمان – التتبيلة : ثلث كوب دبس رمان- نص برتقال معصور – م ك زيت زيتون -م ص سماق – م ص كمون – م ص كزبرة  ناشفة – م ص بشر ليمون – فص ثوم مهروس – ملح

نقص العمود الفقري و نفرد السمان و نسوي خطوط خفيفة بالسكين عشان تدخل التتبيلة..نتبل السمان لمدة ساعتين على الأقل

نغرس أعواد خشب من أعلى الصدر و عند الورك و نشوي  جهة العظم اول  ١٠ دقايق تقريبا على كل جهة .. السمان ماياخذ وقت و يستوي بسرعة.

شيش طاووق

المقادير:

٤ قطع من سيقان دجاج كاملة منزوعة العظم ومقطعة لقطع صغيرة – التتبيلة: علبة زبادي، م ص كمون ، م ص سماق ، فص ثوم مهروس ، بشر ليمون، بصل مقطع جوانح ، م ك اوريغانو فرش ، م ص ملح.

نخلط الدجاج بالتتبيلة و  ونتركها بالثلاجة ليلة كاملة..ننقع اعواد الخشب بالموية لمدة ٢٠ دقيقة  بالنسبة للأشياء الاضافية مع الدجاج انا حطيت فلفل رومي احمر و بصل مقطع مكعبات

نغرس الدجاج و الخضار بالأعواد و نشوي لمدة من ٨ ل ١٠ دقايق على كل جهة او لين يستوي الدجاج

—

شوي بطريقة التي زون – جزء بارد و جزء حار

اجنحة الدجاج متبل بصوص حامض و حلو

فيه البعض يشوي اجنحة الدجاج شوي مباشر بدرجة حرارة متوسطة بس انا افضل طريقة التو زون

المقادير:

كيلو اجنحة دجاج – التتبيلة : ٢ فص ثوم مهروسة – ثلاث ارباع كوب سكر – ٤ م ك ونص صلصة صويا غامقة – ٤ م ك صلصة صويا معتدلة او خفيفة- ٦ م ك  خل الأرز – ١ قرن فلفل مقطع – ملعقتين كبيرة زيت السمسم

نشوح الثوم بزيت السمسم لين يصير ذهبي بعدين نضيف الفلفل الأحمر و نشوح شوي بعدين نحط باقي المقادير و نطبخ على نار هادية لمدة ١٠ دقايق، نترك الصوص لين يبرد (نحفظ منه جزء بسيط عشان التغميس عند التقديم) و نصبه على اجنحة الدجاج ونتركه بالثلاجة ليلة كاملة

نشغل الشواية الغاز جهة وحدة او نجزأ شواية الفحم لجزئين نص فيه فحم و الجزء الثاني فاضي

نحط اجنحة الدجاج ف الجزء البارد و نغطي الشواية لمدة ٢٥ ل ٣٠ دقيقة،

بعد هذي المدة ننقل اجنحة الدجاج للجزء الحار عشان نحمر القشرة و تصير كريسبي.

———

الشوي مع التدخين

التدخين تقدرون تطبقونه على أي وصفة تبونها..يعطي طعم سموكي رهيب 

صدور دجاج مدخنه

المقادير :

٢ صدور دجاج كبيرة الحجم – التتبيلة: ١ م ص بابريكا -م ص كمون – م ص زعتر ناشف -نص م ص كزبرة ناشفة – ملح – زيت زيتون

ندق صدور الدجاج بالمطرقة حتى تصير مسطحة و تستوي عالشواية بشكل متساوي

و نتبل صدور الدجاج لمدة ساعتين ونشوي على حرارة متوسطة لمدة ٨ دقايق تقريبا على كل جهة و بعد مايستوي الدجاج راح نطبق التدخين

رقائق الخشب للتدخين متوفرة بنكهات من اشجار الفواكه وانا اللي عندي بالكرز، الطعم مقبول و رهيب متوفر بساكو

و ضروري ننقع رقائق الخشب لمدة ساعتين على الاقل قبل التدخين

نشيلها وحطها بقصدير و نقفلها بشكل جزئي ونترك فتحة من فوق 

و بعدين نسوي فتحات من تحت عشان يدخل النار  ويشعل الخشب

نحط الدجاج جنب او فوقها والفاصل بينهم شبْك ونغطي و نخليها تدخن تقريبا لمدة من ٢٠ ل ٣٠ دقيقة حسب حجم المادة الغذائية اللي شويناها

مهم جدا الغطا ولا ماراح تنجح عملية التدخين

—

 هذي الأكلات توضيح لمفهوم انواع الشوي و نطبقها على باقي الأصناف المشابهه لها

ان شاء الله تكون الدروس واضحة لكم واي استفسار او سؤال اتركوه بصندوق التعليقات