مساء الخير

الكريب هو عبارة عن بان كيك بس بطبقة انحف و اخف، و انا كانت مشكلتي أزلية مع الكريب طفشت وانا اجرب من طريقة لطريقة الا و ما اوصل لقوام الخليط المطلوب، او تكون كمية البيض زايدة، او كمية الخليط كبيرة بحيث يزيد عندي الكريب و محد ياكله

و أنا لما اقعد في فترة تجارب فاشلة لازم اقطع عنها فترة معينة لين يصفى ذهني و احاول اوصل لحل! 

البعض الحين يقول هيييه تراه كريب و انتي مكبره الموضوع! صدقوني الكريب ادق مما تتصورون اذا انتم لقيتوا وصفة او طريقة ضبطت معاكم من اول مرا فهذا من حسن حظكم بس مو كل مرا تسلم الجره هههههه

نجاح الكريب يعتمد على تناسق كمية المقادير مع بعض بحيث نحصل على خليط قوامه خفييييف و طبقة غير سميكة أثناء الطبخ

لو نستعرض المقادير هي عبارة عن دقيق طبعا اي نوع (دقيق ابيض- بر – حنطة..إلخ) و حليب او خليط بين موية وحليب، دهن ، سكر في حالة لوبنسوي كريب حلو، و البيض 

بالنسبة لكمية البيض ترجع لصاحب الوصفة وحسب الطعم اللي يحبه بس برضو يعتمد على المقادير لأن زيادة عدد البيض تثقل الخليط

انا بعد التجارب توصلت لنسبة مئوية ثابته لكل مقدار في حالة لو زودتوا الكمية او نقصتوا القوام و النتيجة نفسها ماراح تفشل ولا تخسرون شي

انا ماادري اذا فيه اصلا بيرسنتيج عند الخبازين للكريب بس اللي توصلتله من مجهودي الشخصي و تقدرون تغيرون في نوع الدقيق حسب ماتحبون مثل ماسويت مرا بدقيق ابيض و الحين بالوصفة هنا خليط بين دقيق الحنطة و دقيق ابيض

النسب المئوية للمقادير

100% دقيق

100% حليب

150% موية

10% دهن – زبدة ذايبة او زيت

10% سكر

الملح احطه بالنظر وهو مقدار بسيط حسب كمية المقادير

طيب الحين بعد ماوضحت لكم النسب جا دور اني اشرحها لأن اتوقع البعض مو متعود على تقسيم المقادير بهذا الشكل

الأساس عندنا دقيق و تبع للكمية اللي حددتوها راح  نضرب النسب  بكمية الدقيق و تطلع لنا كمية المقادير الباقية

يعني مثلا انا ابي اسوي كمية كبيرة و اخترت وزن الدقيق 200 جرام، اذًا المقادير الباقية اطلع كميتها من الدقيق

200 جرام دقيق x 150% موية = 

300 جرام او مل موية

او مثلا انا لحالي او انا و صديقتي و ابي اسوي كم حبة تكفينا من غير زيادة احدد الدقيق 50 جرام و امشي حسب النسب عشان اطلع المقادير الباقية

بالنسبة للخلط يكون تحريك الخفاقة اليدوية بشكل خفيف لين تتناسق المقادير او الضرب الخفيف بشكل عمودي عشان لا تتكون عندنا شبكة الغلوتن

نترك الخليط لمدة ساعة حتى يمتص الدقيق السائل و الفقاقيع اللي نتجت عن طريق الخلط تختفي

قبل الطبخ لو حسيتوا ان الخليط ثقل (يعتمد على نوع الدقيق) ممكن تضيفون ربع كوب موية او حليب يخففه شوي

في وقت الطبخ كمية صب الكريب تعتمد اعتماد كلّي على مساحة المقلا،

انا أصب ثلث كوب لمقلا غير قابلة للالتصاق مساحتها ٧ إنش تقريبا، و امسحها بدهن اول مرا و حرارة النار واطية

اصب الكريب على جنب المقلا مو بالوسط واحرك بسرعة بشكل دائري لين الخليط يغطي المقلا بشكل كامل

واتركه لمدة دقيقة لدقيقتين لين يبدا ياخذ لون و اقلب الوجه الثاني و تكون فترة الطبخ ثواني اقل من الوجه الأول ( عادةً معروف ان اول واحد مو مضبوط هههههه) و طبعا النتيجة افضل على جهاز الكريب مع الخشبة بس يتطلب مهارة و سرعة

هذا كل شي بشكل مبسط عن درس الكريب و تطبيق الطريقة تحت اختياري بس مو اساسي لنجاحها

——–

المقادير حددتها حسب الكمية اللي تكفيني ، و الدقيق قسمته بالتساوي بين الأبيض و الحنطة يعني بالأساس بدأت ب ١٠٠ جرام

المقادير:

٥٠ جرام دقيق ابيض

٥٠ جرام دقيق الحنطة

١٠٠ مل حليب

١٥٠ مل موية

م ك زبدة ذايبة

١ بيض 

رشة ملح

—

مقادير الحشوة- تكفي لشخص

حزمة سبانخ 

٤ حبات بصل شالوت مفروم ناعم

٤ حبات مشروم

فص ثوم

ربع كوب جبن ماعز مفتت

م ص ليمون

ملح و فلفل اسود

————————-

في طريقة الكريب نمشي حسب خطوات الدرس و نتركه على جنب لين نسوي الحشوة

نشوح الشالوت لين يذبل و نضيف الثوم و المشروم حتى تطلع مويته و نضيف السبانخ و نقلب لين يتقلص حجمه و آخر شي الليمون و الملح و الفلفل الأسود

نحط الحشوة في وسط الكريب و فوقها الجبن و طريقة لف الكريب مو لازم مثل ماسويت تقدرون تسوونها مربعة او راب 

لو تبغون يذوب الجبن دخلوه الفرن دقايق من فوق

و بالعافية