مساء الخير
هذي اول وصفة صحية انزلها على البلوق..من اول ودي انزل وصفة للبانكيك بس بما إن أغلب الوصفات متشابهة فقررت انزل النسخة الصحية منها
الصراحة انا مو من المهتمين بالوصفات الصحية لكن ماعندي مانع اسوي اللذيذ منها
حبيت طعم هالبانكيك كثير خصوصا مع العسل و جوز البيكان…لو عندكم اي صوص معين مثل بالتفاح او الموز بيطلع مررا لذيذ
بالنسبة لطبخ البانكيك انا دايم احب اسويه على الجهاز الخاص فيه لأن الحرارة ثابته و تريحني
و اذا على المقلاة سووا البانكيك على مقلاة غير قابله للالتصاق او الصاج بعد يضبط..خلوها تسخن لمدة دقيقة بعدين ادهنوها بفرشه سيلكون بشوي دهن او بالبخاخ افضل انتبهوا للحرارة عشان لا يحرق
———————————
المقادير:
نص كوب دقيق بر
نص كوب شوفان
نص كوب دقيق ابيض
كوب و ربع حليب خالي الدسم بدرجة حرارة الغرفة
م ك زيت– انا استخدمت الكانولا
1 بيض بدرجة حرارة الغرفة
2 م ص بيكنج باودر
نص م ص ملح
———————————————
نخلط المواد السائلة مع بعض..البيض +الحليب+الزيت
و نخلط المواد الجافة مع بعض
و نصب المواد السائلة و نقلب بشويش لحد مايتكون عندنا خليط
طريقة االطبخ مثل ماكتبت في البداية صبوا بمقدار ثلث كوب كل مرا وخلوها لين تحمر من تحت و تبدا تطلع فقاقيع من فوق و اقلبوها غالبا الوجه الثاني ياخذ وقت اقل
و بالعافية..
