مساء الخير

ذكرت سابقا في موضوع السلطة التايلاندية ان الكويزين التايلاندي يعتمد على تناسق ٤ عناصر في الطعم اللي هي المالح و الحلو و الحامض و الحار..

و تبع لهذا يختلف كل طبق في مقاديره بحيث يجمع بين هذي العناصر الأربعة، ولو نلاحظ في الباد تاي المكون الأساسي هو التمر الهندي اللي يعطينا الحموضة بالاضافة للمقادير الثانية اللي تناسق الطعم حسب الكويزين

انا مرا اهتم للآطباق التايلاندية في تكوين الطعم النهائي، لأني اعشقها و احبها يعني اكررها اكثر من مرا لين اوصل للطعم المطلوب، و ان شاء الله بيضبط معاكم و يعجبكم و تقدرون تسوونه باللحم البقري  طلع برضو لذيذ

—-

المقادير لشخص واحد لأن اهلي بالبيت محد فيهم يحب الأكل التايلاندي فضاعفوا المقادير لو زاد عدد الأفراد

المقادير:

١٠٠ جرام ربيان مقشر و منظف

نص حزمة نودلز فيرميتشيلي (نودلز الأرز) اللي يشبه الفيتتشيني

فص ثوم مهروس

٢ م ك معجون التمر الهندي

٢ م ك وشوي سكر النخيل

م ص و نص صلصة السمك- fish sauce

م ص فلفل احمر بودرة

من ٤ الى ٥ مكعبات التوفو – tofu

ربع كوب فول سوداني محمص و مطحون طحن خشن

١ بيض

نص كوب براعم فاصوليا او براعم الحلبة تلقونها في قسم المعلبات

نص حبة لايم او ليمون 

——————

ننقع النودلز في موية حارة لمدة ٥ دقايق ونشيله على جنب و نغسله بمويه باردة عشان لا يلزق ببعض

غالبا التمر الهندي المعجون من غير حب مو موجود، راح نجيب مغلف التمر الهندي الرطب المتوفر بالسوبر ماركات و ناخذ ثلاث ارباعه و نصب عليه شوي مويه حاره ..مرا شوي! لين نستخلص التمر الهندي و نقيس اذا كمل ملعقتين كبيره او لا

كمية السكر مساوية لكمية التمر الهندي بس انا زودت شوي عشان اوزنها اكثر، سكر النخيل نفس شكل و قوام السكر البني تقريبا موجود بالبقالات الآسيوية او بقسم الآسيوي في السوبرماركتات الكبيرة لو مالقيتوه استخدموا السكر البني

نشوح الثوم ب ٣ ملاعق كبيرة زيت لين يقلب للذهبي اهم شي لا تكون النارعالية عشان لا ينحرق السكر لو حطيناه، نضيف السكر و التمر الهندي مع بعض و نقلب في الصوص لين يذوب السكر، نضيف صلصة السمك

و بعدين نضيف الربيان والفلفل الحار البودره و نقلب لين يستوي 

نضيف التوفو و النودلز و نقلب لين ليندمج مع الصوص

نجمع كل المكونات على جنب ونترك فراغ نكسر فيه البيض و نخلط البيض لوحده لين يصير مخفوق و شبه مستوي و بعدين ندمجه مع باقي المقادير راح يعطي قوام كريمي للصوص

و عند التقديم نحط براعم الفاصوليا و الفول السوداني و اللايم

انا كان ودي اصور الطريقة بتفاصل اكثر بس هالنوع من الأطباق ينطبخ بشكل سريع بس ان شاء الله الطريقة واضحة لكم

و بالعافية