مساء الخير

الريش او أضلاع الغنم من ألذ قطع اللحم و اكثرها طراوه ، تخرب حلاوتها بالمبالغة في مدة الطبخ انا شخصيا مااحب ابالغ حتى في البهارات بس احيانا مايمنع اضافة مقدار واحد او اثنين في حال تغيير الروتين او تطوير الطعم مثل ماسويت في هذي الوصفة..

حشيت الأضلاع بالتين المجفف و قدمته مع مرق مكثف مع الريد واين من غير كحول (مرق دجاج منزلي) و جزر مهروس مع خل البلسميك

لو بس قدمتوه مع الجزر المهروس يكفي..لأن انا للحين ماتفرغت للصوصات اللي اساسها مرق ونزلت تدوينه عنها بالمدونة بس اللي يبي طريقة الصوص بكتبها له بالتفصيل يعني للجادين فقط ههههههههه

عموما اتبعوا خطوات طبخ الريش حتى لو غير محشية راح توصلون للحمة ترفه على قول الكويتيين تذوب بالفم 🙂

——————

المقادير

نص كيلو اضلاع غنم تقريبا 10 ضلوع متصلة

4 حبات تين مجفف منقوع بموية فاتره لمدة ٤ ساعات

م ك ديجون ماسترد

نص م ك عسل

كوب فتات الخبز

ملح و فلفل اسود

مقادير الجزر المهروس:

حبتين جزر كبيره مقطعه شرايح

25 جرام زبدة

م ص كمون حب

م ك خل البلسميك

ملح

—————————-

نشغل الفرن على درجة حرارة 250 سيليزيوس

نقسم الأضلاع لمجموعتين متساوية يعني كل 5 اضلاع متصلة مع بعض

ونسوي Frenching

اللي هو تنظيف عظمة الضلع من الأعلى لحد اللحم

نقطع التين قطع صغيره و بالسكين ندخل في منتصف لحمة الريش عشان نسوي فراغ للحشوة

و ندخل اصبعين و نوسع زيادة و نحشيه بالتين

و نسخن مقلاة مع شوي زيت زيتون لحد مايدخن و نحمر الأضلاع بكل الجهات

و نجففه من اي دهن زايد .. نخلط الديجون ماسترد مع العسل وندهن سطح الأضلاع ..

حاولوا لا تزيدون من سماكة طبقة الماسترد يعني بشكل خفيف و بعدها نلصق فتات الخبز..

و الخطوة هذي اختياريه  يعني ممكن بس توقفون لحد التحميره في المقلاة

ونحط الأضلاع بصينية مناسبة لحجمها..يعني لا صغيرة مرا ( العصارة و الرطوبة ماتتبخر ويصير كأنه مسلوق) ولا كبيرة مرا تنحرق الأضلاع من كمية الحرارة و تنحرق العصارة..يعني وسط يكون فيه فراغ بسيط بالصينية

و ندخلها الفرن لمدة من 20 ل 25 دقيقة راح يكون الاستواء قريب للوسط اي درجة حرارة اللحم الداخلية بين130  140 فهرنهايت.. واذا تبونه كامل الاستواء خلوه ل 30 دقيقة.. بس انا افضل يكون استواء وسط لأن حرام نخسر طراوة اللحم

و بعد  الفرن نخلي الأضلاع ترتاح 10 دقايق قبل التقديم..

الجزر المهروس

نذوب الزبدة و نحمس الجزر مع الكمون لمدة ٥ دقايق تقريبا بعدين نضيف موية فاترة يغطي حبات الجزر و م ص ملح و نخليه على نار عاليه لحد ماتغلي المويه..نوطي النار و نتركه لمدة ربع ساعة او الين مايلين الجزر بعدين نح الجزر مع كوب موية حارة و خل البلسميك في الخلاط لين تنهرس..

انا اسوي الجزر المهروس بالفترة اللي ادخل فيها الأضلاع الفرن عشان اكسب الوقت

و بالعافية..