مساء الخير

التارتين يعني أي خبز محمص وعليه شي قابل للدهن..مثل المربى او الجبن او الزبدة و يكون معاه اضافات من فوق حسب الذوق

و الصراحة هذي الوصفة كانت تأليف و ماتوقعت انها بتكون لذيذة لأن ماقد جرت الحمص مع الأفوكادو يمكن شي غريب كشكل بس الطعم رهيب حبيته مررا! و جربوه صديقاتي وعجبهم قبل لا انزله هنا عالبلوق

الوصفة عبارة عن جزئين  اللي هي الأفوكادو و سلطة الحمص..اذا عندكم شي غير سلطة الحمص تقدرون تغيرون

و برضو تقدرون تستفيدون من وصفة السلطة لحالها لذيذة و صحية

المقادير:

4 أو 5 شرايح خبز محمص

أي نوع خبز متوفر توست او باغيت او اي شي..بالنسبة لي كنت مسوية خبز بالبيت من قبل واستفدت منه في هالوصفة

1 افوكادو مستوي

نص م ك جبن فيلادلفيا لايت

نص م ك عصير ليمون

نص م ص ورستشير صوص

نص م ص ملح — الكمية حسب الذوق

مقادير سلطة الحمص

1 علبة حمص حجم 340 جرام مصفية من مويتها

كوب طماطم كرزية مجففة  مقطع بشكل عشوائي او طماطم كرزية طازجة مقطعة انصاف لو مومتوفر المجفف 

انا جففت الطماطم في البيت لو تبون الطريقة من عيوني

م ك بقدونس مفروم ناعم

نص كوب جبنة بارميزان مبشورة بشر كبير

م ك عصير ليمون

نص م ص كمون

م ص زيت زيتون

ملح و فلفل اسود

—————————————–

نخلط مقادير صوص السلطة مع بعض (عصير الليمون+الكمون+زيت زيتون+الملح و الفلفل الأسود) ونخليه على جنب

بعد ماصفينا الحمص من مويته نخلطه مع الطماطم بعدين الصوص وآخر شي اخلطوا البقدونس المفروم وجبنة البارميزان

اذا بتقدمون التارتين لأحد او عزيمة لا تسوونه قبلها بوقت! الأفوكادو ينشف و يتغير لونه فحاولوا قبل التقديم بدقايق تسوون خلطة الأفوكادو

نهرس الأفوكادو بالشوكة بعدين نضيف باقي المقادير..و نكون مجهزين الخبز المحمص وندهن الأفوكادو و فوقه السلطة..

لا تبالغون في كمية سلطة الحمص عشان لا يحوسكم وانتوا تاكلون هههههه

و بالعافية 🙂