مساء الخير

من اووول كان هذا الطبق في بالي و أأخره كل مرا ! و الدجاج المحشي من الأطباق اللذيذة اللي تمشي مع ايييي شي..باستا على كيف كيفكم بأي نكهة وأي صوص مثل اللي بالصورة سويتها كريمة بيستو ! او تضيفونهم على رز اورزيتو او صوص طماطم بس من غيراضافات ثانية! وانا هنا استخدمت صدور دجاج مع الجلد عشان دخلتها الفرن و الجلد يعطي قوام كريسبي من برا و يحافظ على الدجاج من داخل ماينشف بس فيه طريقة ثانية من غير جلد ! تسوون طبقة خارجية من البقسماط او البانكو الياباني وتمشون على نفس الخطوات في الوصفة 

المقادير:

4 صدور دجاج بالجلد

200 جرام جبنة ريكوتا

ثلث كوب جبنة موزاريلا مبشورة

ثلث كوب جبنة بارميزان مبشورة

حزمة سبانخ او حزمتين حسب كمية الحزمة

بصل صغير مفروم ناعم

فص ثوم مهروس

ملح و فلفل أسود

———————————————–

نحمس البصل لحد مايذبل تماما اهم خطوة ان البصل يذبل كله 

نضيف الثوم بعدين السبانخ و نقلب لين يذبل و آخر شي الملح و الفلفل الأسود 

في صحن كبير نخلط الثلاث اجبان مع بعض و معاهم السبانخ ولو حسيتوا الخلطة تحتاج ملح ضيفوا شوي

نشيل العظم من صدور الدجاج و نقلب الجلد نخليه تحت و اللحم فوق بعدين نغطي صدر الدجاج بنايلون و ندق بالمطرقة لين تصير مسطحة

نرجع نحط النايلون تحت صدر الدجاج ونرش شوي ملح و فلفل أسود و نضيف الخلطة في الوسط و نخلي مسافة على الجوانب عشان لا يطلع الجبن برا

في الصورة نسيت احط النايلون تحت الدجاج

و نبدا نلف الدجاج على بعض و النايلون كأنه يدفه كدعم و مايلف معاه يارب فهمتوا قصدي ههههههههه

و بعدين على الأطراف نسكر الدجاج بقوة عشان تمسك على الجبن 

في هذي الخطوة اللي استخدموا الدجاج من غير جلد يدخلونه الثلاجة لمدة نص ساعة عشان تقدرون تتحكمون فيها وقت التغطية تكون جامدة و متماسكة

نفك النايلون ونكون مجهزين 4 اجزاء من خيط المطبخ موجود في محل ليكلاند بعزيز مول

و نربط الخيط بين الخفيف و القوي بس مجرد يمسك الصدور و ماتنفك

و نرش على سطح الدجاج من برا ملح بس و في المقلا نصب شوي زيت زيتون على نار متوسط و نحمر الرولات لحد ماياخذ لون ذهبي و نكون مسخنين الفرن على درجة حرارة 200 من فترة

ننقل صدور الدجاج على صينية و يفضل بشبك عشان تحمر من كل الجهات بس لو خليتوها تلامس الصينية راح يصير نص مسلوق من مويته و نص ناشف

صدور الدجاج اللي عندي حجمها صغير فأخذت وقت 12 دقيقة بالفرن ! ممكن ياخذ 20 او 25  دقيقة حسب حجم الدجاج بس لو عندكم ثرمومتر شيكوا لين توصل ل 160 فهرنهايت او بالسكين يكون اللحم قاسي و أبيض

و لازم لازم بعد الفرن تتركون الدجاج يرتاح و يمسك على الجبن شوي لمدة 10 دقايق عشان يكون سهل في التقطيع

و بالعافية 🙂