الفطاير من الأكلات  اللذيذة اللي الكل يحبها و ميزتها مالها وقت معين ممكن تكون على الفطور أو على العشا

وطبعا دائم نطلبها من برا لأن قلة يضبطون العجينة وفعلا انا جربت كذا عجينة تحت مسمى مناقيش او فطاير وابدا ماتكون الطعم اللي متعودين عليه

واكيد جربتوا مثلي يا تكون العجينة قاسية او تكون تكون طرية وماهي مقرمشة

الفطاير دائما تكون مقرمشة وطرية بنفس الوقت وهذا اللي يميزها وبعد نقدر نحط الحشوة اللي نبيها من جبنة وزعتر و بيتزا و لحم وغيره

و طبعا فيه ناس كثير ماتضمن نظافة المطاعم و المخابز مع انهم كل شي يسوونه قدامنا  بس مهما كان لما تكون الجبنة مكشوفة في المحل و ألف شخص يدخل

الله اعلم ايش الامراض و الجراثيم الموجودة في الجو وانا ماأعمم على الكل بس الأغلب راح يسوي أي كلام من باب السرعة وضغط العمل

فأنا حاولت و توصلت تقريبا لنفس الفطاير اللي نرغبها وراح اكتب المقادير بس فيه شروط لازم تكون في العجينة

أولا : لازم لازم لازم تكون طرية حتى لو مشيتوا على المقادير ولقيتوها قاسية زيدوا موية شوووووي لين تلين العجينة لأن انا سويتها بالنظر وراح أحاول اكتبها بالضبط

ثانيا: و لازم نتركها تتخمر 45 دقيقة في مكان دافي

ثالثا: عند فرد الفطاير مانخليها سميكة لأن بعد الخبز راح تصير كأنها خبز و لا نخليها رفيعة حتى ماتطلع مثل البسكوت قاسية

فردها يكون وسط حتى نجمع بين الطراوة و القرمشة 

ثالثا: الفرن لازم يكون حار ومشغل قبل الخبز بفترة ودرجة الحرارة 250 أو 200 درجة مئوية و اول 15 دقيقة مانفتح الفرن و بمجرد مايحمر من تحت نشغل معاه الحرارة اللي فوق 

وماقدر اعطي وقت معين اكثر من كذا لأن من فرن لفرن يختلف 

لو مشيتوا على هذه الخطوات راح تطلعلكم فطاير لذيذة واحلا من المطاعم إن شاء الله

مقادير العجينة :

3 أكواب دقيق 

م ك خميرة 

نص م ك سكر

م ك  زبدة مليانه شوي طرية جدا جدا جدا

250 مل حليب بدرجة حرارة الغرفة

نص كوب موية دافية

زيت زيتون للرش في الاخير

—————————————————–

هذه العجينة الافضل نسويها بالعجانة اسرع و اسهل في العجن

أول شي نخلط المكونات الجافة مع بعض الدقيق و الخميرة و السكر 

بعدين نضيف الحليب و الزبدة  ونخلط العجينة 

نضيف النص كوب موية بالتدريج لحد ماتتكون عجينة متماسكة يعني مو شرط النص كوب كله 

لما تتكون عجينة في العجانة نصب الزيت زيتون وهي تعجن تقريبا بمقدار 3 ملاعق كبيرة  نقطة مهمة جدااا من اهم خطوات عجينة الفطاير

بالنهاية لازم تتكون عندنا عجينة طرية  ونتركها تتخمر 45 دقيقة في مكان دافيء وياليت داخل مايكرويف مو شغال لأن الجو بارد حاليا وراح تطول المدة في التخمير 

وطبعا راح تمشون على نفس الشروط اللي فوق كتبتها من فرد و خبز العجينة  

تفردونها وتحطونها على الصينية بعدين الحشوة لأنها طرية راح تتناثر الجبنة 

و بالنسبة للحشوات دائما المتعارف عليها جبنة موزاريلا و عكاوي

أو قشقوان و عكاوي

لبنة تركية  

زعتر مع زيت زيتون 

لحمة بالصلصة 

بيتزا 

ولكم حرية الاختيار بس هذه الحشوات دائما اساسية

🙂