مقبلات

بوت ستيكرز محشي ربيان مع سويت تشيلي صوص

أهلا وسهلا

البوت ستيكرز هو عبارة عن دمبلينق يحمر الجزء السفلي منه على المقلاه و يتبعه صب الماء الحار و يغطى بغطا حتى يطبخ بالكامل في البخار

؟Gyoza ماالفرق بينه وبين ال

الجيوزا هو نفس شكل المنتو يطبخ بطريقتين إما بالبخار أو مسلوق، وليش حددت شكل المنتو؟ لأن البوت ستيكرز يكون بأكثر من شكل إما مثل الأصابع أو مثلثات أو على شكل جيوزا

 يعني البوت ستيكرز هو تكنيك او طريقة طبخ مو مسمى لشكل معين

في عالم الدمبلينق فيه نوعين عجينة وهي إما تعجن بالماء الحار أو الماء البارد، أيهم نختار والسبب؟

اختيار العجينة يعتمد على أسلوب الطبخ اللي راح نطبقه على الدمبلينق، العجينة بالماء البارد يعطي قوام مطاطي قوي يساعد على تماسك الدمبلينق أثناء السلق أو الطبخ بالبخار من غير ماتتقطع، أما العجينة بالماء الحار تعطي قوام حريري خفيف للعجينة بحيث تطبخ على طريقة البوت ستيكرز من غير ماتعطي قوام قاسي من الخارج

و اختيار الشكل برضو إما يكون مثل الأصابع أو على شكل جيوزا 

ميزة الجيوزا ان ممكن تسوونها و تفرزنونها مو لازم يطبخ بنفس الوقت للي عنده ضيق الوقت قبل عزيمة أو أي مناسبة

أنا اخترت حشوة الربيان ممكن بنفس المقادير تستبدلون الربيان بلحم الغنم مفروم فرم ناعم

المقادير:

مقادير العجينة

٢٠٠ جرام دقيق أبيض

٦٠ مل ماء مغلي

٦٠ جرام ماء بدرجة حرارة  الغرفة

نص م ص ملح

مقادير الحشوة:

٢٠٠ جرام ربيان مقشر و منظف

م ص صويا صوص

م ص اويستر صوص

ربع اصبع زنجبيل رطب مبشور

م ص خل أرز 

م ص سكر بني

نص م ص فلفل أسود

١ عود فلفل أخضر مقطع

ربع حزمة كزبرة مفرومة ناعم بالسكين

م ص نشا

مقادير سويت تشيلي صوص:

١٢ حبة فلفل أحمر حار (الكبير مو الصغير التايلاندي) منزوع البذور و مقطع

٤٠٠ مل خل أبيض

ثلاث أرباع كوب سكر أبيض

٢ م ص ملح

٢ م ص صويا صوص

—–

أولا: تجهيز الحشوة

يفرم الربيان بمحضرة الطعام لين يصير قطع صغيرة مفرومة ناعم أو تفرمونه بالسكين ، بعدين نضيف كل المقادير و نخلط الحشوة و نحفظها بالثلاجة لين نحضر العجينة

ثانيًا: العجينة

ملاحظة: أنا عجنت بإيدي ممكن تستخدمون العجانة بدل العجن باليد

نخلط الدقيق مع الملح ثم نصب الماء الحار و نقلب

ونصب الجزء الثاني من الماء و نعجن لين تصير عجينة متماسكة و ناعمة، ننثر عليها شوي دقيق و نغلفها بنايلون ونخليها ترتاح أقل فترة ٢٠ دقيقة إلى ساعة

ثالثًا: الفرد و التشكيل

أنا فضلت أنزل طريقة الفرد بماكينة الباستا أسرع من الطريقة التقليدية و النتيجة أفضل بالنسبة للي ماقد سووا جيوزا من قبل

نقسم العجينة لجزئين و نشتغل بجزء و نغطي الجزء الثاني بالنايلون

ننثر دقيق أثناء الفرد و نبدا نفرد على رقم واحد بعدين نقسم العجينة لجزئين كمان، إلا إذا عندكم القدرة تتحكمون بعجينة طويلة يصير لا تقسمونها مثلي

بعدين نبدا نفرد على ٨،٧،٦،٥،٤،٣،٢

و نقطعها بقطاعة دائرية ٩سم

ونحط الأقراص في كل مره نقطعها بصينية منثور عليها دقيق ونغطيها مره كويس بقماش قطني لين نخلص تقطيع كل الأقراص

في الصورة مثل ماتشوفون كان نثر الدقيق بزيادة فلا تسوون مثلي لأن الدقيق كان عائق انه يتحمر على المقلاه

نطلع الحشوة من الثلاجة و نبدا نحشي العجينة بمقدار ملعقة صغير – استخدمت الملاعق المعيارية

نبلل نصف طرف العجينة حتى تلصق بالطرف الثاني

ونقفلها و نحاول نطلع الهوا منها

نشكل الأطراف عن طريق ثنيها ولصقها بالعجينة

وهذي أسهل طريقة في التشكيل بالنسبة لطريقة الصينيين أصعب شوي يبغالها ممارسة أكثر، ونحط الدمبلنق في صينية و نغطيها بقماش

رابعًا: الطبخ

حسب حجم المقلاة نمسح زيت نباتي على المقلاه و عادي لو زاد شوي عن كمية المسح، و ننتظر تسخن بس مو تدخن

ونصف الدمبلنق ونحاول نصفها بسرعة حتى تتحمر كلها بوقت واحد

 بعد مايتحمر نصب ماء حار تقريبا بمقدار ٥٠ ل ١٠٠ مل حسب كبر حجم المقلاه ونغطي القدر لمدة ٣ دقايق للربيان و ٥ دقايق للحم 

ونشيله من المقلا بعد مدة الطبخ لصحن التقديم

طريقة سويت تشيلي صوص

بعد ماشلنا البذور من الفلفل الأحمر الحار (لازم تكونون قلفز المطبخ عشان تحميكم من حرارة الفلفل) نقطعه بشكل عشوائي و نحطه بالطاحونة مع الخل و نطحن لين ينفرم لقطع صغيرة أو حسب درجة الطحن اللي تفضلونها

بعد الطحن نحطه بقدر مع باقي المقادير و نحرك بالبداية و نقلب لين يذوب السكر 

ونخليه يطبخ على نار هادية لمدة ٢٥ دقيقة 

ويترك لين يبرد تماما قبل الاستخدام او الحفظ

و بالعافية

Comments (4)

  • اهلا و سهلا ، شيف لا هنتي في الصوص هل ممكن استبدل الفلفل بفلفل مجفف نفس الكمية و النوع

    Reply
    • اهلا فيك
      اي تقدرين شيلي البذور و انقعي الفلفل بماء حار لمدة ربع ساعة او لين تصير طرية وبعدين كملي الخطوات في الوصفة

      Reply
  • تسلم الايادي انتي مبدعة اتابعك من سنين ربي يوفقك

    اتمنالك كل خير

    حابة اسأل عن خل الارز هل له بديل ؟؟

    Reply
    • الله يسلمك يا ولاء ان شاء الله اكون عند حسن ظنك دائما
      استخدمي خل تفاح او خل أبيض

      Reply

Write a comment