مساء الخير

كل عام وانتم بخير بعد الزحمة 🙂 من اكثر السنوات اللي حست فيها بعد العيد لا نوم  راضي يتعدل ولا نفس تشتهي الأكل 

و حابه ارجع للمدونة بطبق سهل و لذيذ بنفس الوقت و يتصلح في اي وقت حتى لو النوم حايس 😛

الصوص في هذا الطبق من الصوصات الثقيلة او الغليظة اللي تناسب للشورت باستا او الاشكال الانبوبيه القصيره (بيني – ريجاتوني – فوسيلي..الخ) حتى يمسك الصوص فيها مع باقي المقادير الجامدة و انا كتبت العنوان باستا من غير تحديد و السبب اني ماابي ألزمكم بنوع معين و تقدرون تسوونه حسب الشكل المتوفر و الموجود

يعني الفلات باستا مثل السباجيتي و الفيتتشيني ..الخ من هالنوع ماتناسبها

و بالنسبة لإضافة البيستو كان في الأخير بعد التقديم و لي هدف في تعزيز طعم الباذنجان و الريكوتا بدل مااحط الريحان و جبنة البارميزان مفرقين خلال الطبخ

فرق معاي في الطعم كثير واضاف نكهة لذيذة جدا جربوها و اتمنى تعجبكم

المقادير تكفي من ٣ ل ٤ اشخاص

المقادير 

كوبين شورت باستا جافة – الكمية قبل الطبخ

١ باذنجان متوسط الحجم

١ ونص علبة طماطم مع عصيرها مقطع و مفروم بالسكين

نص بصل متوسط الحجم مفروم ناعم

٢ فص ثوم مهروس

من ملعقتين ل ٣ ملاعق كبيرة جبنة ريكوتا كاملة الدسم 

بيستو ريحان وقت التقديم و صنوبر محمص

—————————-

نقطع الباذنجان لشرايح سميكه و نرش عليها ملح عالجهتين و نتركها لمدة نص ساعة حتى نتخلص من الرطوبة في داخل الباذنجان لأن راح نقليه

واللي مايبغى القلي يكنسل هذي الخطوة (خطوة التمليح عشان لا ينشف خلال الشوي) و يشوي الشرايح بالفرن و بعدين تقطع لمكعبات متوسطة

 بعد التمليح نقطع الباذنجان لمكعبات صغيره او متوسطة و نقليها في المقلا و ارتفاع الزيت انش تقريبا مو قلي عميق 

لين يصير لونه ذهبي

نقلل كمية الزيت و ننظف المقلا و نشوح البصل لين يلين من دقيقتين ل ٣ دقايق و نضيف الثوم و نقلب لين تطلع ريحته و يقلب للذهبي 

و نضيف الطماطم المقطع وعصيرها و نترك الصوص يطبخ على نار هادية من ٥ ل ٨ دقايق لين تتسبك

في خلال هذا الوقت نسلق الباستا حتى توصل لمرحله أل دِنتي (٨ دقايق تقريبا و يختلف من نوع للثاني حسب الماركة) ، اللي هي مرحلة استواء الباستا مع ثبات قوامها او شكلها لأن لو طبخنا اكثر من اللازم راح يقلب الطبق لمرقوق 🙂

نملح الصوص و نضيف الباستا مع شوي من مويتها  ونقلب ونضيف الباذنجان و جبنة ريكوتا 

و آخر شي في الطبق مع التقديم نضيف بيستو الريحان و زيادة جبنة ريكوتا لو حابين

و بالعافية