مساء الخير

السلطعون او السرطان او الكراب من اسهل الانواع البحرية في الطبخ بس يحتاج منكهات و اضافات تزيد من حلاوة الطعم..وللأسف من اكثر الأطباق سوءا اللي اكلته في اغلب المطاعم..لما يكون فيه مطعم متخصص لتقديم السلطعون و في النهاية اتفاجأ ان مافيه اي تميّز او اني اقدر اسوي افضل منه في البيت بمراااحل، ليش اتعنّى و اطلع عشانه ؟

انا شخصيا اشوف ان الكراب طبخه بالبيت افضل، لأن مافيه اي صعوبة و اقدر اختار الطريقة اللي ابيها و البهارات و الاضافات من غير تكلفة

و الطريقة اللي بكتبها لكم هي التقليدية المعتادة  مع اضافة بهارات سويتها بالبيت مو جاهزة..وانا ضفت بطاطس بس و تقدرون تضيفون ذره

الطريقة فيها تنظيف الكراب قبل الطبخ بالاضافة لطريقة الطبخ

—————-

المقادير

تقريبا كيلو كراب الأزرق الصغير

البهارات:

2 م ص ملح الكرفس

م ص بابريكا حلوة

نص م ص فلفل احمر بودرة، او حسب درجة الحرارة اللي تبونها

م ص خردل اصفر بودره

م ص كمون

١ ورق غار

م ص زعتر ناشف او فرش

٤ حبات بطاطس صغير مقطعه من الوسط

و ذره للي يبي

م ك سكر خشن

50 جرام زبدة مذوبه

—————————————-

نبدا بالتنظيف

نشيل القشرة الصلبه من فوق وراح يطلع لنا الشحم و الخياشيم، و القشرة لا ترمونها غسلوها و نظفوها كويس لأن راح نضيفها لاستخلاص النكهة في موية السلق 

نشيل الخياشيم و الشحم واي رمل داخل بينهم ننظفه عن طريق موية الحنفيه 

ممكن تكسرون الكراب لنصين لو كان القدر اللي عندكم مايكفي او تصير زحمة فوق بعض و يطفح

نذوب 20 جرام زبدة في قدر كبير يكفي لكمية السلطعون اللي عندكم و نخلط البهارات المطحونة مع بعض و نضيف ثلاث ارباع الكمية مع البطاطس على الزبده و نقلب ثواني و نضيف موية فاترة و ورق الغار و الزعتر الناشف و الملح و نقلب ، انا ضفت ٤ لتر تقريبا لأن القدر كبير 

و ننتظر لين يغلي بعدين نضيف السلطعون و القشرة الصلبه و ٢ جوانح ليمون و نقفل القدر و نتركه يطبخ لمدة لين 15 ل20 دقيقة..

مدة الطبخ تعتمد على وزن السلطون اللي بتطبخونه، واختلفت الأقاويل في المدة ولكن هالاختلاف مافيه فرق كبير بينهم..واللي ارسيت عليه انا انه لكل 100  جرام 3 دقايق طبخ

و كل زيادة في الوزن نزيد مدة الطبخ

بعد ماانتهت مدة الطبخ نخلط باقي البهارات مع الزبدة المذوبة و نصبها على كل حبات السلطعون..

وجهزوا المطرقة بدل الشوك و الملاعق هههههههه

و بالعافية