مساء الخير
في الفترة الأخيرة مع كثرة حسابات الطبخ في الانستغرام ألاحظ الأغلب يجهل مفهوم السلطة اللي صارت عبارة عن كل شي بالثلاجة وخلط انواع صلصات وصوصات كثيرة من غير تحديد وش النكهة اللي ابيها تبرز ..مجرد خلط وبس
بالنسبة لي السلطة هي ملكة السفرة مو شرط اني اخليها صحية مية بالمية بس على الأقل اسوي شي لذيذ ومتناسق مع المقادير..
و مو شرط ان في كل سلطة لازم احط عشرين مكون! ممكن تكون المكونات قليلة بس عززت نكهتها بصوص يناسبها..
في هذي السلطة لو تلاحظون المكونات قليلة..ولكن اشتغلت على ابراز النكهة من ناحيتين رئيسية..
اولا: في الفينيغريت او الصلصة عززتها بالجبن لأن الزهره تحب الأجبان
ثانيا: تنكيه الزيتون بالأعشاب..وطريقتها مثل المخلل نحط الزيتون بعلبة مع زيت زيتون واعشاب فرش او مجففة (زعتر بري – إكليل الجبل) وثوم ..ونتركها يومين بالثلاجة وكل ماطولت اكثر كل ماطلعت النكهة واضحة واقوى
ثالثا: اضفت معاه خبز محمص..اي نوع خبز تحبون تضيفونه
وكانت النتيجة طعم لذيذ و متناسق و خفيف
لو حابين تضيفون بقدونس ..او أي ورقيات ما تأثر في الطعم كثيييير مثل الخس
————————————–
المقادير:
راس زهرة مقطع
زيتون منكه – طريقته بالتفصيل تحت
خبز فرنسي مقطع شرايح نحيفة و محمص
الفينيغريت:
ثلث كوب زيت زيتون
3 م ك خل ابيض
م ص ديجون مسترد
3 م ك جبنة غرويير مبشورة بشر صغير – ممكن جبنة بارميزان بديل
—————————————-
طريقة الزيتون المنكه
انا استخدمت اعشاب مجففة زعتر بري – اكليل الجبل – طرخون ..م ص من كل نوع لكل كوب زيتون
و خلطت الاعشاب مع نص كوب زيت زيتون و صبيتهم على الزيتون مع الثوم
ونغطي العلبة ونحفظها في الثلاجة إلى اسبوعين او اكثر..بس ممكن نستخدمها بعد يومين
صلصة الخل او الفينيغريت
نخلط الديجون مسترد و الخل و الجبن المبشورة ونضيف الزيت زيتون بالتدريج حتى يتكون عندنا مستحلب او صلصة ثقيلة
فيه طريقة اسهل : ممكن تضيفون كل المقادير في علبة وتقفلونها و ترجونها ثواني بشكل سريع
و حتى الفينيغريت ممكن تحفظونه يومين بالثلاجة
شوي الزهرة
بعد ماقطعنا الزهرة نرش زيت زيتون و ملح و فلفل أسود..ونحطه بصينية بحيث ماتكون الزهرة فوق بعض
وندخله الفرن على درجة حرارة 200 لمدة 20 دقيقة او لحد مايصير طري
في وقت التقديم نخلط الزيتون مع الزهرة و زي ماقلت تقدرون تضيفون ورقيات من بقدونس و خس وآخر شي الصلصة و الخبز المحمص
و بالعافية
Comments (9)
[…] وش النكهة اللي ابيها تبرز ..مجرد خلط وبس بالنسبة لي … أكمل القراءة ← المصدر: chef hissas […]
طبقتها جداً جداًلذيذة يسلمو عالوصفة الحلوة طبعاً فيه اشياء ماكانت عندي بس حاولت ابدلها باشياء قريبه لها ..😍😘😊😊
بألف عافية 😍👌🏻
الله يجزاك خيير مرره مره احسها لذيذه
بس استغربت انك شيف ماشاء الله وتستعملين الاعشاب المعلبه من فرشلي؟ مالها اي طعم ابدًا ولا نكهه ورائحه.. وجودها زي عدمها -بالنسبه لي-
عندك بديل ؟ هههههه غالبا اشتري من العطارة بس هذي حقت اهلي واستخدمها احيانا..صادقة مالها نكهة مو زي حقت العطارين و العضوية من ابازير
[…] هنا […]
[…] هنا […]
أبد خلط كل شيء على بعض موب سلطتي 😂🌝 ، بس حبيت معلومتك جداً قيمه وأقترح تسوي لنا درس عن أساسيات السلطات ، بما أني كثير أحب السلطات فأتمنى أني أتعلم كثر عشان نبدع مثلك 😻❤
اهلا جوود نورتي مدونتي <3
ان شاء الله نتكلم عن السلطات هنا او سناب شات