مساء الخير
خبز البريوش على كثر ماسويته ماذقت ألذ من هالوصفة و هي من كتاب توماس كيلير صدق صدق لو سويتوه راح تدمنون عليه و كل مااخلص راح ترجعون تسوون من جديد
البريوش هو خبز اساسه زبده و بيض اللي يعطيه الطعم الغني بالنكهة و اللذييييييذ..و دايم عجينة البريوش تجي بأشكال مختلفة ممكن نستخدمها للسينمون رول او البرجر و فيه له اسماء مختلفة حسب الشكل النهائي اللي راح نشكل فيه العجينة
Cross buns , Tropezienne , Nanterre
هذي اسماء اشكال خبز نسويها من عجينة البريوش وانا سويت النانتيغ
و سويت من خبز البرويش ساندويتش جبنة بلو تشيز مع كومبوت التين..(كومبوت التين مثل المربى بس بشكل سريع) هذول المكونين مع بعض ادمان عندي من فترة هههههههه
و بعد لو تسوون الفرنش توست منه امممممم بيطلع شي خرافي لازم تجربونه
بس في وصفة توماس كيلير المشكلة الوحيدة انه دقيق جدددددا في المقادير يعني لدرجة حتى البيض يوزنه بالجرام انا حاولت احول المقادير لأكواب إلا البيض راح يكون بالوصف والمحظوظ اللي عنده ميزان إلكتروني
————————–
المقادير:
ملاحظة : المقادير لازم تكون بدرجة حرارة الغرفة
كوبين دقيق
م ص و ثلاث ارباع خميرة
2 م ك + 2 م ص سكر ابيض
م ص ملح
136 جرام بيض يعني انا حسبتهم بيضتين ونص حجم كبير
46 جرام حليب كامل الدسم يعني ثلث كوب تقريبا
122 جرام زبدة مقطعة لمكعبات صغيرة
——————————————
اهم شي يكون المطبخ بارد عشان لا تذوب معاكم الزبدة في العجينة
الخطوة الأولى : العجن
نخلط الدقيق مع الخميرة و بعدين نضيف كل المقادير ماعدا الزبدة و نعجن بالعجانة على السرعة البطيئة لمدة 30 دقيقة عشان نطور الغلوتين في العجينة..
نضيف قطع الزبدة على دفعات لين تندمج مع بعض و نكمل عجن لمدة عشر دقايق..راح تلاحظون ان العجينة تلزق بالإيد كذا معناة ان العجينة وصلت للقوام المطلوب
الخطوة الثانية : الشد وطوي العجينة
هذي الخطوة راح انزل صور لنفس الطريقة بس كان تطبيقي عليها لعجينة غير ماامداني اصور وقت ماسويت البريوش
نرش على سطح خشبي دقيق و نحط العجينة و نفردها بالإيد لين تصير مسطحة شوي
نشد الطرف اللي عاليسار ونطويه لطرف العجينة و اليمين نفس الشي
و الجزء اللي تحت و اللي فوق نفس الحركة نشد و نطوي للوسط
و نحط العجينة في قالب وسط و نغفلها بنايلون و نتركها تخمر لمدة ساعة! بعد الساعة نعيد حركة الشد و الطوي ونرجعها القالب و نغلفها بنايلون على مرتين و ندخلها الثلاجة لمدة ليلة كاملة
الخطوة الثالثة: التشكيل و التخمير و الخبْز
حجم القالب المستخدم 8 ونص في 4 ونص إنش
في اليوم الثاني نطلع العجينة و نضغط بالاأصابع لين تنفرد وتروح الغازات..و نشكل 8 كور بحجم 50 جرام لكل كورة واللي ماعندة ميزان قدروا من عندكم انها تكون بنفس الحجم كل وحدة
هنا الفيديو يوضح لكم طريقة تشكيل العجينة في القالب في الدقيقة 3:21 وراح تبقى شوي من العجينة ممكن تطبقون الأشكال الثانية لأنها صغيره
ندهن القالب بشوي زبدة او بالبخاخ و نرص الكور جنب بعد و ندهن الكور بالبيض من فوق و نتركها تتضاعف حجمها لمدة من ساعتين و نص او 3
اذا لزقت في النايلون معناه جاهز
نشغل الفرن على درجة حرارة 350 فهرنهايت تقريبا 180 سيليزيوس قبل ماندخل البريوش بساعة
و ندهن مرا ثانية بالبيض قبل الفرن وندخله لمدة 20 إلى 25 دقيقة حسب حرارة فرنكم ..
و بعد الفرن لازم يبرد قبل التقديم و تقدرون تقطعونه شرايح و تحفظونه بالثلاجة مثل ما انا مسوية
و ان شاء الله تكون الخطوات واضحة لكم و بالعافية
Comments (28)
ما شاء الله تبارك الله ، وبي يحفظك من كل شر استفدت منك كثيييير و فعلا خبز البريوش جدا جدا لذيذ ، انا عملته خبز للبرغر و طلع لذيذ و طري بس ألطريقه غير أخدتها من شيف فاليوتيوب ، على ان طريقتك طويله شوي لكن باْذن الله أطبقها لانو منظر الخبز تبارك الله 😍😍😍
تسلم أيدينك و أيدين ام جابتك🌹
يسعدك ربي حبيبتي مشكورة طبقيها و بتعجبك ان شاء الله 😘
يعطيك العافيه من جد الكتاب هذا رائع
الله يعافيك
ماشاء الله تبارك الله
أتابعك بانستقرام طبخك وتصويرك يفتح النفس
متحمسة أجرب البيريوش ان شاء الله يضبط 😍😍
ياحبيلك مشكورة حبيبتي ان شاء الله بيعجبك👌
كنت بسأل .. لما ادخل البريوش الفرن .. يكون طول ال 20-25 دقيقة من تحت .. و لا احطو من فوق آخر 5 دقايق ؟ معليش ع إطالة السؤال .. وشكرا
ايه طول الوقت من تحت و شغلي الإضاءة و آخر ٥ دقايق من فوق
تحممممسسست اسويه 😍😍 الله يسعدك ويجزاك خير
وريني النتيجة لو سويتيه 👍🏻
يسعد صباحك شيف حصه ..بسألك انا اشتريت بودرة القلوتين هل اقدر اضيفها لعجينة البريوش و اقلل مدة العجن فالعجانه..و ما هي افضل العجاين اللي اقدر اضيف لها قلوتين
ماتحتاجين بودرة الغلوتين في البريوش
تحتاجين الغلوتين في خبز البيغل و التشيباتا و الفوكاشيا ممكن
مشكووورة عالوصفه بس عندي كمن سؤال
الخميرة فوريه ؟ و الطحين AP و لا strong bread flour ?
و شكرا مره ثانيه 😁
اي خميرة فورية
و الطحين تقدرين تستخدمين Ap
مسالخير حصه ممكن اسم الكتاب الله يعافيك
وهل ممكن الطريقه بالجرام لانها اضمن من الاكواب(:
ابشري
الدقيق ١٧٥ جرام
الخميره ٤ جرام
السكر ٢١ جرام
الملح ٤ جرام
و الباقي كتبته بالجرام
و اسم الكتاب Bouchon bakery
الله يعطيك العافيه مشكوره
الله يعافيك حياك
كل التوفيق لك شيف حصة👨🍳
يعطيك العافيه شيف حصة في مرحلة الشد والطي نكرر الطي مرتين مع التخمير يعني اشد واطوي واخمره ساعه وارجع اشد واطوي واخمر ساعهوارجع اشد واطوي واخمر ساعه وبعدين احطه بالثلاجة
ايوا بالضبط
سويت الطحين بالوزن 175 يطلع اقل من كوبين صح
لا توزنين على ١٧٥ امشي على المقادير بالأكواب
يعطيج العافية وشكرا لانج حطيتي المقادير بالغرام، كم مرة اعيدالشد والطي مرتين او ثلاث، وقبل ما ادخلها الثلاجة اغلف العجين او اغلف الصحن من فوق؟
مرتين شد و طوي
تغلفين الصحن بس
هل اسخن الفرن لمدة ساعه قبل الخبز نفس ما كتبتي؟ مو وايد ساعه عشن تسخين؟ يعطيج الف عااافيه روعه الوصفات
أو نص ساعة المهم الفرن لازم يكون حار قبل الخبز